Kisi Janab Bhi Parcham Na Lahoo Ka Nikala

کسی جانب سے بھی پرچم نہ لہو کا نکلا 

اب کے موسم میں بھی عالم وہی ہو کا نکلا 

دست قاتل سے کچھ امید شفا تھی لیکن 

نوک خنجر سے بھی کانٹا نہ گلو کا نکلا 

عشق الزام لگاتا تھا ہوس پر کیا 

یہ منافق بھی ترے وصل کا بھوکا نکلا 

جی نہیں چاہتا مے خانے کو جائیں جب سے 

شیخ بھی بزم نشیں اہل سبو کا نکلا 

دل کو ہم چھوڑ کے دنیا کی طرف آئے تھے 

یہ شبستاں بھی اسی غالیہ مو کا نکلا 

ہم عبث سوزن و رشتہ لیے گلیوں میں پھرے 

کسی دل میں نہ کوئی کام رفو کا نکلا 

یار بے فیض سے کیوں ہم کو توقع تھی فرازؔ 

جو نہ اپنا نہ ہمارا نہ عدو کا نکلا