Khud Ko Tere Mayar Say Ghat Kar Nahi Dekha

خود کو ترے معیار سے گھٹ کر نہیں دیکھا 

جو چھوڑ گیا اس کو پلٹ کر نہیں دیکھا 

میری طرح تو نے شب ہجراں نہیں کاٹی 

میری طرح اس تیغ پہ کٹ کر نہیں دیکھا 

تو دشنۂ نفرت ہی کو لہراتا رہا ہے 

تو نے کبھی دشمن سے لپٹ کر نہیں دیکھا 

تھے کوچۂ جاناں سے پرے بھی کئی منظر 

دل نے کبھی اس راہ سے ہٹ کر نہیں دیکھا 

اب یاد نہیں مجھ کو فرازؔ اپنا بھی پیکر 

جس روز سے بکھرا ہوں سمٹ کر نہیں دیکھا